Thursday, March 15, 2012

Ethiopia Attacks 3 training camps inside Eritrea - ETV



በአፋር ክልል በኩል በኢትዮ/ኤርትራ ድንበር ላይ የፀረ ሰላም ኃይሎች መናኸሪያ በነበረው የሻዓቢያ ካምፕ ላይ መጋቢት 6/2004 ዓ.ም ንጋት ላይ ጥቃት መፈፀሙን የኢፌዲሪ የመከላከያ ሚኒስቴር አስታወቀ፡፡



ሚኒስቴሩ መጋቢት 6/2004 ዓ.ም በተለይም ለኢትዮጵያ ሬድዮና ቴሌቪዥን ድርጅት እንደገለፀው ጥቃቱ የተሰነዘረባቸው በኤርትራ ግዛት በሚገኙት እና ከድንበር 18፣17፣እና14 ኪሎ ሜትር ርቀት ላይ በሚገኙት ራሚድ፣ጊምቢ እና ገላህቤ በሚባሉት የሻዓቢያ ካምፖች ላይ ነው፡፡ ጥቃቱም ሙሉ በመሉ ስኬታማ በሆነ መንገድ መጠናቀቁን የሚኒስቴሩ መግለጫ ያመለክታል፡፡


ወደፊትም ሻዓቢያ ተላላኪ አሸባሪዎችን በመላክ የኢትዮጵያን ሰላምና ልማትን ለማደናቀፍ የሚያደርገውን እንቅስቃሴ እስካላቆመ ድረስ ተመሳሳይ እርምጃ ይወሰዳል ብሏል፡፡

የኤርትራ መንግስት አሸባሪዎችን በማሰማራት የኢትዮጵያን ሰላምና ልማት ለማደናቀፍ በርካታ የፀረ-ሰላም ድርጊቶችን ሲፈፅም ቆይቷል፡፡ ባለፈው ወር አጋማሽ እንኳን በኢትዮ/ኤርትራ ድንበር አካባቢ የሚገኘውን ኤርታሌን እየጎበኙ በነበሩ ቱሪስቶች ላይ የኤርትራ መንግስት ያሰማራቸው አሸባሪዎች ጥቃት መፈፀማቸው የሚታወስ ነው፡፡


በጥቃቱም 5 ቱሪስቶች ተገድለዋል፣በሶስቱ ላይ ደግሞ የመቁሰል አደጋ ደርሷል፣እንዲሁም ሁለቱ ጀርመናዊያን እና ሁለት ኢትዮጵያውያን በአሸባሪዎች ተጠልፈው ተወስደዋል፡፡


የአፋር የሀገር ሽማግሌዎች ባደረጉት ጥረት ግን ሁለቱ ጀርመናዊያን በቅርቡ ሲለቀቁ ሁለት ኢትዮጵያዊያን ግን አሁንም በኤርትራ ግዛት ውስጥ በአሸባሪዎች እንደተያዙ ናቸው፡፡

የኤርትራ መንግስት ከፀረ-ሰላም ድርጊቱ ካለመታቀቡ በላይ አዲስ አበባን እንደ ባግዳድ ለማድረግ የሚሰራ ኃይል በመሆኑ ካሁን በኋላ ለሚፈፅመው ለእያንዳንዱ ፀረ-ሰላም ተግባር ተመጣጣኝ የሆነ ራስን የመከላከል እርምጃ እንደሚወስድ የኢትዮጵያ መንግስት ማሳሰቡ ይታወሳል፡፡  (ምንጭ፡ ኢሬቴድ)

No comments:

Post a Comment